Ingawa ugonjwa wa moyo mara nyingi huhusishwa na watu wazima, watoto pia wanaweza kuathiriwa na magonjwa ya moyo. Kwa bahati mbaya, dalili zake kwa watoto zinaweza kuwa tofauti na zile za watu wazima na mara nyingi hazitambuliki mapema.
Ugonjwa wa Moyo kwa Watoto Ni Nini?
Ugonjwa wa moyo kwa watoto unaweza kuwa wa kuzaliwa nao (congenital) au wa kupata baada ya kuzaliwa (acquired).
Congenital heart disease ni hali ya mtoto kuzaliwa na kasoro kwenye moyo.
Acquired heart disease ni ugonjwa wa moyo unaojitokeza baada ya kuzaliwa, mara nyingi kutokana na maambukizi au sababu nyingine za kiafya.
Dalili za Ugonjwa wa Moyo kwa Watoto
Zifuatazo ni dalili kuu zinazoweza kuashiria kuwa mtoto ana matatizo ya moyo:
1. Kupumua kwa shida au haraka isiyo ya kawaida
Watoto wenye matatizo ya moyo hupumua kwa kasi, hasa wakati wa kulala au kula.
2. Kuchoka haraka
Mtoto anaweza kuchoka haraka anaponyonya, kula au kucheza, ukilinganisha na watoto wa umri wake.
3. Rangi ya ngozi kuwa ya buluu (Cyanosis)
Midomo, kucha, vidole au ngozi ya mtoto inaweza kuwa na rangi ya bluu, hasa anapolia au kufanya kazi yoyote ya mwili.
4. Kuvimba miguu, macho au tumbo
Hii ni ishara ya moyo kushindwa kusukuma damu vizuri.
5. Kukosa hamu ya kula na kukua polepole
Watoto walio na ugonjwa wa moyo huwa na changamoto ya kunyonya, kula chakula na hawapandi uzito kwa kasi inayotakiwa.
6. Mapigo ya moyo kuwa ya kasi au yasiyo ya kawaida
Mapigo ya moyo ya haraka sana, au kusikika tofauti na kawaida, ni ishara inayoweza kuashiria tatizo.
7. Maambukizi ya kupumua ya mara kwa mara
Watoto wenye matatizo ya moyo hupata homa ya mapafu (pneumonia) mara kwa mara.
8. Kutokwa na jasho kupita kiasi
Kutoa jasho sana, hata kama mtoto hafanyi kazi nzito au mazingira si ya joto, ni dalili inayopaswa kufuatiliwa.
9. Kulala sana au kutoamka kirahisi
Watoto walio na matatizo ya moyo mara nyingi huwa na usingizi mwingi na ni wagumu kuamka au kuwa macho.
10. Kutokwa na damu puani au kuchanganyikiwa
Hii hutokea mara chache lakini inaweza kuashiria moyo kushindwa kufanya kazi vizuri na kusababisha upungufu wa oksijeni kwenye ubongo.
Aina za Magonjwa ya Moyo kwa Watoto
Septal defects: Mashimo kwenye kuta zinazotenganisha vyumba vya moyo.
Patent ductus arteriosus (PDA): Mshipa unaopaswa kufungwa baada ya kuzaliwa unabaki wazi.
Tetralogy of Fallot: Kundi la kasoro nne kubwa za moyo.
Kawasaki disease: Ugonjwa unaoshambulia mishipa ya damu na unaweza kusababisha kuvimba kwa mishipa ya moyo.
Rheumatic heart disease: Husababishwa na maambukizi ya strep throat yasiyotibiwa.
Hatua za Kuchukua Kama Mtoto Ana Dalili
Muone daktari wa watoto au wa moyo haraka iwezekanavyo
Fanya vipimo kama ECG, ECHO, au X-ray ya kifua
Fuata ushauri wa daktari kuhusu lishe, dawa, na matibabu ya upasuaji kama inahitajika
Kuwa na ufuatiliaji wa mara kwa mara ili kujua maendeleo ya hali ya mtoto
